ვახუშტი კოტეტიშვილის 85 წლის საიუბილეო თარიღთან დაკავშირებით, ფონდი „დიოგენეს“ ინიციატივით „ვახუშტი კოტეტიშვილის სახელობის ახალგაზრდა მთარგმნელთა კონკურსი“ გამოცხადდა. პროექტი ტარდება საქართველოს განათლების, მეცნიერების, კულტურისა და სპორტის სამინისტროს და ივანე ჯავახიშვილის სახელობის თბილისის სახელმწიფო უნივერსიტეტის ჰუმანიტარულ მეცნიერებათა ფაკულტეტის მხარდაჭერით. კონკურსი სამ ნომინაციაში გამოცხადდა: პოეზია, მხატვრული პროზა, არამხატვრული ტექსტი (დოკუმენტური პროზა, ესეისტიკა, კრიტიკა, პუბლიცისტიკა) და მასში მონაწილეობის მიღება შეეძლო 20-დან 35 წლამდე ასაკის ნებისმიერ მსურველს. მონაწილეობის მსურველებს საკონკურსო განაცხადი ელექტრონულად უნდა გამოეგზავნათ 2020 წლის 1 ნოემბრიდან 10 ნოემბრის ჩათვლით. გამარჯვებულები 2020 წლის 10 დეკემბერს გამოვლინდებიან. თითოეულ ნომინაციაში გაიცემა სამი პრემია 1000, 500 და 300 ლარის ოდენობით. ამავე პროექტის ფარგლებში დაიბეჭდება საუკეთესო თარგმანების კრებული.